Soomaalida waa bulsho hodan ku ah abwaano iyo Maansayahano foolaad ah, kuwaasoo ka dalleeyay deelqaaf iyo naxli intuba; dabuubaha gabay iyo tixaha maanso ee ay curiyeen, Afka Soomaliga iyo inta ku hadashana u dhaafay dhigaal- murtiyeed dheeman iyo luul ah.
Hadaba waxaa jira mid ka mid ah baarqabtaan oo ubareeray inuu ka leexdo qaabka ay caanka ku tahay suugaanta iyo gabayada soomaaliyeed kaasoo ah; In gabyaagu si qumaati ah u abaaro ujeedada iyo arrinta uu ka maansoonayo, asaga oo adeegsanaya hadba erayada iyo oraahda ku haboon ujeedkiisa, amba asaga oo adeegsanaya sarbeeb uu ku daahay ujeedooyin waayen.
Gabyaaga Qamaan waxa uu awood u helay inuu si farshaxnimo ah ugu shaqlo maansooyinkiisa sawir-maskaxeed, si daal iyo dhib la'aan ah ugu sharxayaa dhageystaha ujeedkiisa isaga oo hor keenaya muuqaal uu ku laray dareenka dhabta ah ee uu isagu qabo si uu sahal ugu rumeysto dhageystaha, isaga oonan u baahan faaafihin iyo fasiraad dheer.
Bal aynu milicsanno tuduco tusaalooyin ah oo ka mid ah gabayadiisa:-
(Baadida ninbaa kula deydeya, daalna kaa badane
Oon doonahayn inaad heshana , daayin abidkaaye.....). Bal u fiirso sid uu gabyaagu inoo tusaaleynayo laqdabada ,laba wajiileynta iyo munaafaqnimada isga oo anan adeegsan erayo muujinaya arrin kaas.Lakin taa badelkeeda waxa uu ina horkeenay sawir-maskaxeed farshaxan ah oo aynu madaxa uruxnay, ugana kaaftooney sharaxaad dheer.
Tusalle 2aad(Toorida ninkii kuu dadbee, daabku uu celiyey
Iyo kii duleedshaay ku yidhi, wax isma doorshaane....) halkani waxa uu abaanku nagu barayaa sida aysan ukala sokeyn midka dakanada gala iyo midka u sacba-tumaya, oo ay dhaliishoodu tahay mid qura.Ma uusan adeegsan "Xarfaha Isu-ekeysiinta" si uu usimo danbiga iyo eedda ay leeyihiin landooduba, Hayeeshee wuxuu nagu haqabtiray sawir iyo muuqaal run ah oo taa ka marag-kacaya.
Tuusaale 3aad(Cawl baa midgaan soo gasbaday, jeer gabraar tagaye
Isagoon wax lagu gowraciyo, geedhisaba haysan.....Jeenay gafsiisoo minday, qodatay garaaye....) Bal eeg sida farshaxnimada ah ee abwaanku u cabiray weedhiisa, isga oon bixin faaafihin dheer ama anan adeegsan sarbeeb dahsoon ayuu qaab sawir ah ugu duurxulay Maansayahan kale oo ay is maangaranayan. Waxa uu ka maarmay in uu yiraahdo; Nin dakana galey oon dabinka la gaadayay oo dalaq isagu soo yiri, daliilkina isku oogay ayaa tahay!!!
(Ma dumaalo naaguhu ninkay , nolol ku dayrshaane
Dayib uma yidhaahdaan jeeroo , hawli daashado e
Nin walaalkii doorsaday Ilaah , derejo siin waaye.....)
Kuwaas iyo in badan oo fashaxanno kale ah ayaa ka buuxa maansooyinka abwaanka weyn ee Qamaan Bulxan (E.H.N). Waxa hubaal ah in suugaanta soomaaliyeed ay u babac-dhigi karto suugaanta caalamiga ah hadii aysan kaba sidan. Waxaa haboon in barashada suugaantaas hodanka laga hormarsho barashada (William Shakespeare & Emurl-qeys ki Carbeed)
Comments
Post a Comment